ကျန်းမာရေးနှင့် အားကစားဝန်ကြီးဌာန ဒုတိယဝန်ကြီး ဒေါက်တာမြလေးစိန် ကျန်းမာရေးလူ့စွမ်းအားအရင်းအမြစ်ဦးစီးဌာန၊ မန္တလေး ဆေးဘက်ဆိုင်ရာ နည်းပညာတက္ကသိုလ် IMAGING CENTER ဖွင့်ပွဲတက်ရောက်မိန့်ခွန်းပြောကြား ဖဲကြိုးဖြတ်ဖွင့်လှစ်

နေပြည်တော်၊ အောက်တိုဘာလ(၇)ရက်။

ကျန်းမာရေးနှင့်အားကစားဝန်ကြီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာန၊ မန္တလေးဆေးဘက်ဆိုင်ရာနည်းပညာတက္ကသိုလ် Imaging Center ဖွင့်ပွဲအခမ်းအနားအား ယနေ့ နံနက်(၉)နာရီ အချိန်တွင် မန္တလေးမြို့ဆေးဘက်ဆိုင်ရာ နည်းပညာတက္ကသိုလ်ခန်းမ၌ ကျင်းပပြုလုပ်ရာ ကျန်းမာရေးနှင့်အားကစားဝန်ကြီးဌာန ဒုတိယဝန်ကြီး ဒေါက်တာမြလေးစိန်တို့ တက်ရောက်မိန့်ခွန်းပြောကြားပြီး ဖဲကြိုးဖြတ်ဖွင့်လှစ်ပေးပါသည်။

အဆိုပါ ဖွင့်ပွဲအခမ်းအနားသို့ ဒုတိယဝန်ကြီးနှင့်အတူ မန္တလေးတိုင်းဒေသကြီးအစိုးရအဖွဲ့ဝင် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီး ဒေါက်တာစိုးသန်း၊ ကျန်းမာရေးလူ့စွမ်းအားအရင်းအမြစ်ဦးစီးဌာန ညွှန်ကြားရေးမှူးချုပ် ဒေါက်တာတင်တင်လေး၊ မန္တလေးဆေးဘက်ဆိုင်ရာနည်းပညာတက္ကသိုလ် ပါမောက္ခချုပ် ဒေါက်တာမြမြအေး၊ မန္တလေးဆေးဘက်ဆိုင်ရာသူနာပြုတက္ကသိုလ် ပါမောက္ခချုပ် ဒေါက်တာ ခင်သက်ဝေနှင့် ဖိတ်ကြားထားသောဧည့်သည်တော်များ တက်ရောက်ကြပါသည်။

ရှေးဦးစွာ ဒုတိယဝန်ကြီး ဒေါက်တာမြလေးစိန်မှ အဖွင့်အမှာစကားပြောကြားရာတွင် ကျန်းမာရေးနှင့်အားကစားဝန်ကြီးဌာန၏ Department of Human Resources for Health သည် Vision , Mission များ ချမှတ်၍ လုပ်ငန်းတာဝန်များကို အကောင်အထည်ဖော် ဆောင်ရွက်လျက်ရှိပါကြောင်း၊ ရည်ရွယ်ချက်မှာ အရည်အသွေးပြည့်ဝသော ကျန်းမာရေးစောင့်ရှောက်မှုပေးနိုင်ရန်အတွက် အရည်အချင်းပြည့်မီသည့် ကျန်းမာရေးလူ့စွမ်းအားစု အမျိုးမျိုးကို အမျိုးသားကျန်းမာရေးစီမံကိန်း လိုအပ်ချက်များနှင့်အညီ အလုံအလောက် မွေးထုတ်ပေးနိုင်ရန်ဖြစ်ကြောင်း၊ ရည်မှန်းချက်အဖြစ် အမျိုးသားကျန်းမာရေး မူဝါဒများနှင့်အညီ ကျန်းမာရေးလူ့စွမ်းအားအရင်းအမြစ်ဖွံ့ဖြိုးတိုးတက်ရေးအတွက် စီမံကိန်းရေးဆွဲကာ အကောင်အထည်ဖော်ခြင်းနှင့် ကျန်းမာရေ လုပ်ငန်းများ စနစ်တကျဆောင်ရွက်ရန် လုပ်ငန်းတာဝန်(၆)ခုရှိပါကြောင်း၊ ခြုံငုံပြီးတင်ပြရပါလျှင် ကျန်းမာရေးလူ့စွမ်းအားစုအမျိုးမျိုး၏ အရည်အသွေးတိုးတက်အောင်ဆောင်ရွက်ခြင်း၊ လိုအပ်ချက်များနှင့်အညီ လေ့ကျင့်မွေးထုတ်နိုင်ရေးကို ကျန်းမာရေးနှင့်အားကစားဝန်ကြီးဌာနရှိ အခြားသော ဦးစီးဌာနများနှင့် ညှိနှိုင်းဆောင်ရွက်ရန်ဖြစ်ကြောင်း၊ လုပ်ငန်းတာဝန်များကိုဆောင်ရွက်ရာတွင် လိုအပ်လျက်ရှိသော ဆေးဘက်ဆိုင်ရာနည်းပညာရှင်များကို မွေးထုတ်ပေးနိုင်ရေးအတွက် ဆေးဘက်ဆိုင်ရာနည်းပညာ တက္ကသိုလ်ကို ဖွင့်လှစ်ဆောင်ရွက်ခဲ့ခြင်းဖြစ်ပါကြောင်း၊ (၂ဝဝဝ ပြည့်နှစ် မေလ ၁၂ရက်)တွင် စတင်ဖွင့်လှစ်ပြီး ယခုအခါ (၁၈)နှစ်ကာလအထိရောက်ရှိပြီး ကျောင်းသားဦးရေ (၁၆၂၃)ဦး ဘွဲ့လွန်(၃ဝ)ဦးကို အောင်မြင်စွာ ပညာသင်ပေးနိုင်ခဲ့ပါကြောင်း၊ ယခုတက္ကသိုလ်သည် ဆေးဘက်ဆိုင်ရာဓါတ်ခွဲနည်းပညာဘွဲ့၊ ဆေးဘက်ဆိုင်ရာ ဓါတ်မှန်နှင့် ပုံရိပ်ဖော်နည်းပညာဘွဲ့၊ ဆေးဘက်ဆိုင်ရာခန္ဓာသန်စွမ်းမှု နည်းပညာဘွဲ့၊ ဓါတ်မှန်နှင့်ပုံရိပ်ဖော် ပေါင်းကူးတို့အဖြစ် ဆေးဘက်ဆိုင်ရာ အသံလွန်လှိုင်းဖြင့် ရောဂါရှာဖွေခြင်း၊ နည်းပညာဒီပလိုမာဆေးဘက်ဆိုင်ရာ မဟာသိပ္ပံဘွဲ့များကိုပါ နှစ်စဉ်မွေးထုတ်ပေးလျက်ရှိပါကြောင်း၊ ဆေးဘက်ဆိုင်ရာနည်းပညာတက္ကသိုလ်အနေနှင့် ပညာရပ်ဆိုင်ရာများတွင် နိုင်ငံတကာနှင့်တန်းတူ လိုက်ပါနိုင်ရေးအတွက် ပြည်တွင်းသင်ကြားရေးကို အထူးဂရုစိုက်သည့်အပြင် နိုင်ငံခြားတက္ကသိုလ်များနှင့် အခြားပညာရေးဆိုင်ရာ ဆွေးနွေးမှုများကို ဆောင်ရွက်ခြင်း၊ ဆေးဘက်ဆိုင်ရာ သုတေသနလုပ်ငန်းများမှရရှိသော တွေ့ရှိချက်များကိုအသုံချကာ ပြည်သူလူထုကျန်းမာရေးကို ပိုမိုဂရုစိုက်ဆောင်ရွက်လျက်ရှိပါကြောင်း၊ ယနေ့ ဖွင့်လှစ်သည့် Imaging Center သည် ဆေးတက္ကသိုလ်အင်္ဂါရပ်နှင့်အညီ လျော်ညီဆောက်လုပ်ပေးထားပြီး Imaging Center နှင့် သက်ဆိုင်သော ဓါတ်မှန်၊ တီဗွီဓါတ်မှန်စက်များထားရှိမည်ဖြစ်ပါကြောင်း၊ ၄င်းစက်များကို အသုံးပြုပြီး ဘွဲ့ကြို ဘွဲ့လွန် ကျောင်းသား/ကျောင်းသူများကို ယခုထက်ပိုမို၍ လက်တွေ့နယ်ပယ်မှာ သင်ကြားပေးမည်ဖြစ်ပါသောကြောင့် အလွန်ထိုက်တန်သော အကျိုးကျေးဇူးကိုရရှိပြီး ပြည်သူလူထုကို ကျန်းမာရေးဝန်ဆောင်မှု ပိုမိုဆောင်ရွက်ပေးနိုင်မည်ဖြစ်ပါကြောင်း၊ ကျောင်းသား/ကျောင်းသူများအနေဖြင့် နိုင်ငံတော်မှပံ့ပိုးပေးပါသော အဆောက်အဦးImaging စက်များကို စည်းကမ်းတကျ ကိုင်တွယ်အသုံးပြုကာ သင်ကြားတတ်မြောက်ပြီး ပြည်သူလူထုကို ကျန်းမာရေးစောင့်ရှောက်ပေးနိုင်သော ဆေးဘက်ဆိုင်ရာကျွမ်းကျင်ပညာရှင်ဖြစ်အောင် ကြိုးစားကြစေလိုကြောင်း ပြောကြားပါသည်။

ဆက်လက်၍ မန္တလေးတိုင်းဒေသကြီးအစိုးရအဖွဲ့ဝင် စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီး ဒေါက်တာစိုးသန်းမှ မန္တလေးဆေးဘက်ဆိုင်ရာ နည်းပညာတက္ကသိုလ်နှင့်ပတ်သက်၍ သမိုင်းကြောင်းနှင့် လုပ်ငန်းတာဝန်များ ကြိုးစားဆောင်ရွက်ခဲ့မှုအခြေအနေများ၊ တိုင်းဒေသကြီးအစိုးရအဖွဲ့ ပူးပေါင်းဆောင်ရွက်မှု အခြေအနေများအား ရှင်းလင်းပြောကြားခဲ့ပါသည်။

ဆက်လက်၍ ညွှန်ကြားရေးမှူးချုပ် ဒေါက်တာတင်တင်လေးမှ ဆေးဘက်ဆိုင်ရာ နည်းပညာတက္ကသိုလ်၏ သင်ကြားသောဘာသာရပ်များရဲ့ ရည်ရွယ်ချက်များကို ရှင်းလင်းပြောကြားပါသည်။ ထို့နောက် အခမ်းအနားသို့တက်ရောက်လာကြသော ဧည့်သည်တော်များအား ပါမောက္ခချုပ် ဒေါက်တာမြမြအေးမှ အထိမ်းအမှတ်လက်ဆောင်များကို အသီးသီးပေးအပ်ပါသည်။

ထို့နောက် ဆေးဘက်ဆိုင်ရာ နည်းပညာတက္ကသိုလ် Imaging Center ဖွင့်ပွဲကို ဆက်လက်ကျင်းပရာ ဒုတိယဝန်ကြီး ဒေါက်တာမြလေးစိန်၊ မန္တလေးတိုင်းဒေသကြီးအစိုးရအဖွဲ့ဝင် စိုက်ပျိုးရေး၊ မွေးမြူရေး နှင့်ဆည်မြောင်းဝန်ကြီး ဒေါက်တာစိုးသန်း၊ ကျန်းမာရေးလူ့စွမ်းအားအရင်းအမြစ်ဦးစီးဌာန ညွှန်ကြားရေးမှူးချုပ် ဒေါက်တာ တင်တင်လေး၊ မန္တလေးဆေးဘက်ဆိုင်ရာ နည်းပညာတက္ကသိုလ် ပါမောက္ခချုပ် ဒေါက်တာမြမြအေးနှင့် ဒေါက်တာခင်သက်ဝေတို့မှ Imaging Center အဆောင်သစ်အား ဖဲကြိုးဖြတ်ဖွင့်လှစ်ပေးခဲ့ပါသည်။

ဆက်လက်၍ ဒုတိယဝန်ကြီးနှင့်အဖွဲ့သည် Imaging Center အဆောင်သစ် မော်ကွန်းကမ္ဗည်းကျောက်စာအား အမွှေးနံ့သာများဖြင့်ပက်ဖြန်းပြီး အဆောင်သစ်အား လိုက်လံကြည့်ရှုစစ်ဆေးခဲ့ကြောင်း သတင်းရရှိပါသည်။

103 reads

Share this!