ရန်ကုန် ဇန်နဝါရီ ၁။
မြန်မာနိုင်ငံဘောလုံးအဖွဲ့ချုပ်သည် မြန်မာ ယူ-၂၂ အသင်းအတွက် ဆီးဂိမ်းပြိုင်ပွဲမတိုင်မီ ဖိတ်ခေါ်ပြိုင်ပွဲ ကျင်းပရန် စီစဉ်လျက်ရှိသည်။
ယခုနှစ် ဖိတ်ခေါ်ပြိုင်ပွဲတွင် အာရှနှင့် အာဆီယံလူငယ်အသင်းများကို ဖိတ်ကြားသွားမည်ဖြစ်သည်။ မြန်မာ ယူ-၂၂ အသင်းသည် ဆီးဂိမ်းပြိုင်ပွဲတွင် အောင်မြင်မှုရရန် ပြင်ဆင်ဆောင်ရွက်မည်ဖြစ်ပြီး ပြိုင်ပွဲ မတိုင်မီ လုံလောက်သည့် နိုင်ငံတကာ အတွေ့အကြုံရစေရန် ဖိတ်ခေါ်ပြိုင်ပွဲ ကျင်းပခြင်းဖြစ်သည်။
မြန်မာယူ-၂၂ အသင်းသည် ယခုနှစ်အတွင်း အဓိကပြိုင်ပွဲသုံးခု ယှဉ်ပြိုင်ရမည်ဖြစ်ပြီး ဖေဖော်ဝါရီလတွင် အာဆီယံ ယူ-၂၂ ပြိုင်ပွဲ၊ မတ်လတွင် အာရှယူ-၂၃ ခြေစစ်ပွဲ၊ နိုဝင်ဘာလနှင့် ဒီဇင်ဘာလတွင် ဆီးဂိမ်းပြိုင်ပွဲတို့ ယှဉ်ပြိုင်ရမည်ဖြစ်သည်။ အကြိမ်(၃ဝ) မြောက် ဆီးဂိမ်းပြိုင်ပွဲကို နိုဝင်ဘာလ နောက်ဆုံးပတ်တွင် ကျင်းပမည်ဖြစ်သောကြောင့် နိုဝင်ဘာလဆန်းပိုင်းတွင် ဖိတ်ခေါ်ပြိုင်ပွဲ ကျင်းပနိုင်ရန် ကြိုတင်ဆောင်ရွက်လျက်ရှိသည်။
မြန်မာယူ-၂၂ အသင်းသည် ဇန်နဝါရီလ ပထမနှင့် ဒုတိယပတ်တွင် ကစားမည့် အရှေ့အလယ်ပိုင်းခရီးစဉ်အတွက် ကစားသမား ၂ဝ ရွေးချယ်ထားသော်လည်း ယင်းခရီးစဉ်ပြီးဆုံးပါက ကစားသမားသစ် များ ထပ်မံရွေးချယ်ကာ လေ့ကျင့်ပြင်ဆင် သွားမည်ဖြစ်သည်။
ကြေးမုံသတင်းစာမှ ကောက်နှုတ်ဖော်ပြသည်။
