၂ဝ၁၇ ခုနှစ်၊ တိုင်းဒေသကြီးနှင့်ပြည်နယ် အမျိုးသား။အမျိုးသမီး စက်ဘီးပြိုင်ပွဲ မကွေးတိုင်းဒေသကြီးအမျိုးသမီးအသင်း၊ ရန်ကုန်တိုင်းဒေသကြီးအမျိုးသားအသင်း အနိုင်ရဗိုလ်စွဲ

 

 

မျိုးဆက်သစ် အားကစားသမားများ စဉ်ဆက်မပြတ် ထွက်ပေါ်လာစေရေးအတွက် တိုင်းဒေသကြီးနှင့်ပြည်နယ် အားကစားပြိုင်ပွဲများကို နှစ်စဉ်ကျင်းပပြုလုပ်လျက်ရှိရာ ၂ဝ၁၇ခုနှစ်၊ တိုင်းဒေသကြီးနှင့်ပြည်နယ် အမျိုးသား/အမျိုးသမီးစက်ဘီးပြိုင်ပွဲ တာဝေးပွဲစဉ်များ ကို ယနေ့နံနက်(၆)နာရီအချိန်တွင် ဝဏ္ဏသိဒ္ဓိအားကစားကွင်း Gate(A))၌ ယှဉ်ပြိုင်ကစားကြပြီး ဆုချီးမြှင့်ပွဲကို ကျင်းပပြုလုပ်ရာ မြန်မာနိုင်ငံအိုလံပစ်ကော်မတီ အထွေထွေအတွင်းရေးမှူး  အားကစားနှင့်ကာယပညာ ဦးစီးဌာန ညွှန်ကြားရေးမှူးချုပ်ဦးမျိုးလှိုင်၊ မြန်မာနိုင်ငံစက်ဘီးအဖွဲ့ချုပ်မှ ဒုတိယဥက္ကဌများနှင့် တာဝန်ရှိ သူများ၊ အားကစားနှင့်ကာယပညာဦးစီးဌာနမှ တာဝန်ရှိသူများ တက်ရောက်ဆုများချီးမြှင့်ပါသည်။ 

 

ရှေးဦးစွာ အမျိုးသမီး(၆ဝ)ကီလိုမီတာ တာဝေးပြိုင်ပွဲနှင့် အမျိုးသား(၁ဝဝ)ကီလိုမီတာ တာဝေးပြိုင်ပွဲ များကျင်းပခဲ့ပါသည်။

 

ပြိုင်ပွဲအပြီး ဆုပေးပွဲအခမ်းအနားကို ဆက်လက်ကျင်းပရာ အမျိုးသမီး(၉)ကီလိုမီတာတွင် ပထမဆုရရှိသော မကွေးတိုင်းဒေသကြီးအသင်း၊ ဒုတိယဆုရရှိသော တနင်္သာရီတိုင်းဒေသကြီးအသင်းနှင့် တတိယဆုရရှိသွားသော ဧရာဝတီတိုင်းဒေသကြီးအသင်းတို့အား မြန်မာနိုင်ငံစက်ဘီးအဖွဲ့ချုပ်ဒုတိယဥက္ကဌ ဦးကိုကြီးမှ တစ်ဦးချင်းဆုတံဆိပ်များအား ပေးအပ်ချီးမြှင့်ခဲ့ပါသည်။

 

 

ဆက်လက်၍ အမျိုးသား(၁၅)ကီလိုမီတာတွင် ပထမဆုရရှိသော  ရန်ကုန်တိုင်းဒေသကြီးအသင်း၊ ဒုတိယဆုရရှိသော တနင်္သာရီတိုင်းဒေသကြီးအသင်းနှင့် တတိယဆုရရှိသွားသော မကွေးတိုင်းဒေသကြီး အသင်းတို့အား အားကစားနှင့်ကာယပညာဦးစီးဌာန ညွှန်ကြားရေးမှူးဦးဌေးအောင်မှ တစ်ဦးချင်းဆုတံဆိပ် များအား ပေးအပ်ချီးမြှင့်ခဲ့ပါသည်။

 

ဆက်လက်၍ အမျိုးသမီး(၆ဝ)ကီလိုမီတာ တာဝေးပြိုင်ပွဲတွင် ပထမဆုရရှိသော  လင်းလဲ့ဇော် (မကွေး)၊ ဒုတိယဆုရရှိသော စုစုရည်(ဧရာဝတီ)နှင့် တတိယဆုရရှိသွားသော ခင်နှင်းဝေ (မကွေး)တို့အား မြန်မာနိုင်ငံစက်ဘီးအဖွဲ့ချုပ်ဒုတိယဥက္ကဌ ဦးဂျွန်ဆင်းမှ တစ်ဦးချင်းဆုတံဆိပ်များကို ပေးအပ်ချီးမြှင့်ခဲ့ပါသည်။

 

ဆက်လက်၍ အမျိုးသား(၁ဝဝ)ကီလိုမီတာ တာဝေးပြိုင်ပွဲတွင် ပထမဆုရရှိသော  ထက်အာကာလွင်(ရန်ကုန်)၊ ဒုတိယဆုရရှိသော စိုးမိုးနိုင်(ရန်ကုန်)နှင့် တတိယဆုရရှိသွားသော စည်သူရိန်ဖြိုး(ရန်ကုန်)တို့အား မြန်မာနိုင်ငံစက်ဘီးအဖွဲ့ချုပ်ဒုတိယဥက္ကဌ ဦးမြတ်သူမှ တစ်ဦးချင်းဆုတံဆိပ် များအား ပေးအပ်ချီးမြှင့်ခဲ့ပါသည်။

 

 

ဆက်လက်၍ အမျိုးသမီးအကောင်းဆုံးအားကစားသမားဆုရရှိသွားသော လင်းလဲ့ဇော်(မကွေး)နှင့် အမျိုးသားအကောင်းဆုံး အားကစားသမားဆုရရှိသွားသော စောအယ်ခူး(ရန်ကုန်)တို့အား အားကစားနှင့် ကာယပညာဦးစီးဌာန ဒုတိယညွှန်ကြားရေးမှူးချုပ် ဦးထွန်းမြင့်ဦးမှ တစ်ဦးချင်းဆုတံဆိပ် ဆုများအား ပေးအပ်ချီးမြှင့်ခဲ့ပါသည်။

 

 

ယင်းနောက် တံခွန်စိုက်ဆုရရှိသောအသင်းများအား တံခွန်စိုက်ဆုများချီးမြှင့်ရာ အမျိုးသမီး တံခွန်စိုက်ကို စုစုပေါင်းရမှတ်(၄၂)မှတ်ဖြင့်ရရှိသော မကွေးတိုင်းဒေသကြီးအသင်းကို MSP ကုမ္ပဏီမှချီးမြှင့်ငွေကျပ် (၅)သိန်းနှင့်အတူ့ တံခွန်စိုက်ဆုကိုလည်းကောင်း၊ အမျိုးသားတံခွန်စိုက်ကို စုစုပေါင်းရမှတ်(၄၅)ဖြင့်ရရှိသော ရန်ကုန်တိုင်းဒေသကြီးအသင်းကို CB Bank မှ ချီးမြှင့်ငွေကျပ် (၁ဝ)သိန်းနှင့်အတူ တံခွန်စိုက်ဆုများကို အသီးသီးပေးအပ်ခဲ့ပြီး ဆုရရှိသောအသင်းများနှင့်အတူ စုပေါင်း အမှတ်တရမှတ်တမ်းတင် ဓါတ်ပုံများရိုက်ကူးပြီး ဆုပေးပွဲအခမ်းအနားကိုရုပ်သိမ်းခဲ့ကြောင်း သတင်းရရှိပါသည်။