၂ဝ၁၇-၂ဝ၁၈ ပညာသင်နှစ် အားကစားနှင့်ကာယပညာသိပ္ပံ (ရန်ကုန်၊ မန္တလေး၊ မော်လမြိုင်၊ တောင်ကြီး) ကျောင်းများ၏ အားကစားပြိုင်ပွဲ ဆဌမနေ့ဆက်လက်ကျင်းပ

 

 

ကျန်းမာရေးနှင့်အားကစားဝန်ကြီးဌာန အားကစားနှင့်ကာယပညာဦးစီးဌာနမှ ကြီးမှူး၍ မြန်မာ့အားကစား အစဉ်အမြဲ တိုးတက်စေရေးနှင့် မျိုးဆက်သစ် အားကစားသမားများ စဉ်ဆက်မပြတ် ပေါ်ထွက်လာစေရန် ရည်ရွယ်ဖွင့်လှစ်ထားသော အားကစားနှင့်ကာယပညာသိပ္ပံ (ရန်ကုန်၊ မန္တလေး၊ မော်လမြိုင်၊ တောင်ကြီး) ကျောင်းများ၏ ၂ဝ၁၇-၂ဝ၁၈ ပညာသင်နှစ် အားကစားပြိုင်ပွဲများအား ယနေ့နံနက် (၈)နာရီအချိန်တွင် စတင်ကျင်းပရာ ဝဏ္ဏသိဒ္ဓိအားကစားရုံ (A)၌ ကြက်တောင်ပြိုင်ပွဲကို ကျင်းပပြုလုပ်ရာ  အမျိုးသားတစ်ဦးချင်းပြိုင်ပွဲ၊  အမျိုးသမီးတစ်ဦးချင်းပြိုင်ပွဲ၊ အမျိုးသားနှစ်ယောက်တွဲပြိုင်ပွဲ၊ အမျိုးသမီးနှစ်ယောက်တွဲပြိုင်ပွဲ၊ အမျိုးသား အမျိုးသမီး နှစ်ယောက်တွဲပြိုင်ပွဲများကို ယှဉ်ပြိုင်ကစားကြပါသည်။ 

 

ဆက်လက်၍ Squash  ပြိုင်ပွဲကို TC-1  လေ့ကျင့်ရေးရုံတွင် ကျင်းပပြုလုပ်ရာ အမျိုးသား/အမျိုးသမီး တစ်ဦးချင်းပြိုင်ပွဲ၊ အမျိုးသား/အမျိုးသမီးနှစ်ယောက်တွဲပြိုင်ပွဲ၊ အမျိုးသား အသင်းလိုက်ပြိုင်ပွဲများကို ကျင်းပပြုလုပ်ခဲ့သည်။ ပြိုင်ပွဲအပြီး ဆုပေးပွဲအခမ်းအနားကို ဆက်လက် ကျင်းပရာ အားကစားနှင့်ကာယပညာဦးစီးဌာန တာဝန်ရှိသူများမှ ဆုများပေးအပ်ချီးမြှင့်ခဲ့ကြသည်။ 

 

 

ဆက်လက်၍ ဘတ်စကက်ဘောပြိုင်ပွဲများကို TC-1  လေ့ကျင့်ရေးကွင်း၌ ကျင်းပပြုလုပ်ရာ အမျိုးသမီး အုပ်စုပတ်လည်ပွဲစဉ်များအဖြစ် အား/ကာသိပ္ပံ (ရန်ကုန်) နှင့် အား/ကာသိပ္ပံ(တောင်ကြီး)၊ အား/ကာသိပ္ပံ (မော်လမြိုင်) နှင့် အား/ကာသိပ္ပံ(မန္တလေး)၊ အမျိုးသားအုပ်စုပတ်လည် ပွဲစဉ်များအဖြစ် အား/ကာသိပ္ပံ(ရန်ကုန်)နှင့် အား/ကာသိပ္ပံ(မန္တလေး)၊ အား/ကာသိပ္ပံ(မော်လမြိုင်)နှင့် အား/ကာသိပ္ပံ (တောင်ကြီး) ပွဲစဉ်များအားယှဉ်ပြိုင်ကစားကြပါသည်။ ဆက်လက်ပြီး သေနတ်ပစ်ပြိုင်ပွဲများကို TC-2 လယ်ဝေးသေနတ်ပစ်ရုံ၌ ကျင်းပပြုလုပ်ရာ အမျိုးသမီးပွဲစဉ်အဖြစ် လေရိုင်ဖယ်၊ အမျိုးသားပွဲစဉ်အဖြစ် လေပစ္စတို၊ လေရိုင်ဖယ် ပွဲစဉ်များယှဉ်ပြိုင်ကစားကြပါသည်။

 

 

ဆက်လက်၍ ကျွမ်းဘားပြိုင်ပွဲများကို TC-2  လယ်ဝေးကျွမ်းဘားရုံ၌ ကျင်းပပြုလုပ်ရာ အမျိုးသမီးပွဲစဉ်အဖြစ် မြင်းခုန်ဘားပြိုင်ပွဲ၊ ၂တန်းနိမ့်မြင့်ဘားပြိုင်ပွဲ၊ ချိန်ဆဘားပြိုင်ပွဲ၊ အမျိုးသား ပွဲစဉ်များအဖြစ် မြေပြင်ပြိုင်ပွဲ၊ သံကွင်းတပ်မြင်းခုန်ဘားပြိုင်ပွဲ၊ ၂တန်းဘားပြိုင်ပွဲ၊ သံကွင်းဘားပြိုင်ပွဲ၊ ၁တန်းဘားပြိုင်ပွဲများ ယှဉ်ပြိုင်ကစားကြပါသည်။

 

ထို့နောက် ဝူရှူးပြိုင်ပွဲများကို TC-2  လယ်ဝေးဝူရှူးရုံ၌ ကျင်းပပြုလုပ်ရာ အမျိုးသား/အမျိုးသမီးပြိုင်ပွဲ ပွဲစဉ်များအဖြစ် ချန်းချွမ် ပုံစံ(၃)/ပုံစံ(၁)၊ နန်းချွမ် ပုံစံ(၃)/ပုံစံ(၁)၊ ထိုက်ချိချွမ် ပုံစံ(၃) ပြိုင်ပွဲ၊ ပွဲစဉ်များအား ယှဉ်ပြိုင်ကစားကြပါသည်။ ပြိုင်ပွဲအပြီး ဆုပေးပွဲ အခမ်းအနားကို ဆက်လက်ကျင်းပရာ အားကစားနှင့်ကာယပညာဦးစီးဌာန တာဝန်ရှိသူများမှ ဆုများ ပေးအပ်ချီးမြှင့်ခဲ့ကြသည်။