၂၀၁၉ ခုနှစ်၊ တိုင်းဒေသကြီးနှင့်ပြည်နယ် ရေကူးပြိုင်ပွဲ ဖွင့်ပွဲအခမ်းအနားကျင်းပ၊ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင် တက်ရောက်အမှာစကားပြောကြား

နေပြည်တော် ၊ ဇွန်လ(၂၀) ရက်။

ကျန်းမာရေးနှင့်အားကစား၀န်ကြီးဌာန၊ အားကစားနှင့်ကာယပညာဦးစီးဌာနနှင့် မြန်မာနိုင်ငံရေကူးအဖွဲ့ချုပ်တို့ပူးပေါင်း၍ ၂၀၁၉ ခုနှစ်၊ တိုင်းဒေသကြီးနှင့်ပြည်နယ် ရေကူးပြိုင်ပွဲဖွင့်ပွဲအခမ်းအနားနှင့် ပြိုင်ပွဲပွဲစဉ်များကို ယနေ့နံနက် (၉း၀၀)နာရီအချိန်မှစတင်၍ ၀ဏ္ဏသိဒ္ဓိရေကူးကန်၌ကျင်းပပြုလုပ်ရာ အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်၊ ကျန်းမာရေးနှင့်အားကစား၀န်ကြီးဌာန ဒုတိယအမြဲတမ်းအတွင်း၀န် ဦးမြသန်းထိုက်၊ အားကစားနှင့်ကာယပညာဦးစီးဌာနမှ ဒုတိယညွှန်ကြားရေးမှူးချုပ်များဖြစ်ကြသော ဦးကျော်ဆန်းနှင့် ဦးကျော်ဦး၊ အားကစားနှင့်ကာယပညာဦးစီးဌာန ညွှန်ကြားရေးမှူးများ၊ မြန်မာနိုင်ငံရေကူးအားကစားအဖွဲ့ချုပ်မှ တာ၀န်ရှိသူများ၊ အားကစားနှင့်ကာယပညာဦးစီးဌာနမှ တာ၀န်ရှိသူများ၊ တိုင်းဒေသကြီးနှင့် ပြည်နယ်များမှ ပြိုင်ပွဲ၀င်အသင်း အုပ်ချုပ်သူ/နည်းပြနှင့် အားကစားသမားများ တက်ရောက်ကြပါသည်။

အစီအစဉ်အရ ပြိုင်ပွဲ၀င်အသင်းများကွင်းအတွင်း နေရာယူပြီးနောက် ညွှန်ကြားရေးမှူးချုပ်မှ အမှာစကားပြောကြားရာတွင် တိုင်းဒေသကြီးနှင့်ပြည်နယ် ရေကူးပြိုင်ပွဲကို ကျင်းပပေးရခြင်း၏ ရည်ရွယ်ချက် မှာ လူငယ်များရေကူးအားကစားနည်းကို ပိုမိုစိတ်ပါ၀င်စားလာစေရေးနှင့် ထူးချွန်ထက်မြက်သည့် မျိုးဆက်သစ်ရေကူးအားကစားသမားများ ပေါ်ထွက်လာစေလိုကြောင်း၊ ရေကူးအားကစားနည်းသည် နိုင်ငံ့ဂုဏ် ဆောင်နိုင်ခဲ့သော အားကစားနည်းဖြစ်ပြီး နိုင်ငံတကာပြိုင်ပွဲများတွင် တစ်ဦးတည်းနှင့် ဆုတံဆိပ်များစွာ ဆွတ်ခူးရယူနိုင်သော အားကစားနည်းဖြစ်ကြောင်း၊ မြန်မာနိုင်ငံရေကူးအားကစား အဖွဲ့ချုပ်အနေနှင့် (၂၆)ကြိမ်မြောက် အရှေ့တောင်အာရှအားကစားပြိုင်ပွဲ၊ (၂၇)ကြိမ်မြောက် အရှေ့တောင်အာရှ အားကစားပြိုင်ပွဲ၊ ၂၀၁၆ ခုနှစ်၊ ထိုင်းနိုင်ငံတွင် ကျင်းပပြုလုပ်ခဲ့သော Princess Chulahorn Championship 2016 ပြိုင်ပွဲ၊ ၂၀၁၈ ခုနှစ်၊ ထိုင်းနိုင်ငံတွင်ကျင်းပပြုလုပ်ခဲ့သော Princess Chulahorn Swimming Championship 2018 ဖိတ်ခေါ်ပြိုင်ပွဲနှင့် 19^th ASEAN University Game ပြိုင်ပွဲများတွင် ရွှေ၊ ငွေ၊ ကြေးဆုတံဆိပ်များရရှိခဲ့ကြောင်း၊ ယနေ့ပြိုင်ပွဲကို ၀င်ရောက်ယှဉ်ပြိုင်ကြသော တိုင်းဒေသကြီးနှင့်ပြည်နယ်အသီးသီးမှ အားကစားသမားများအနေဖြင့် မိမိတို့၏ အရည်အချင်းများကို အစွမ်းကုန်ဖော်ထုတ်ပြသပြီး မိမိတို့ တိုင်းဒေသကြီးနှင့်ပြည်နယ်အသင်း အောင်နိုင်ရေးအတွက် ဇွဲ၊ စိတ်ဓါတ်အပြည့်နှင့် သန့်ရှင်းစွာ ယှဉ်ပြိုင်ကစားကြရန်လိုအပ်ကြောင်း၊ တိုင်းဒေသကြီးနှင့်ပြည်နယ်ပြိုင်ပွဲမှတစ်ဆင့် နိုင်ငံ့ဂုဏ်ဆောင်နိုင်သော အားကစားသမားကောင်းများဖြစ်အောင် ကြိုးစားကြရန်တိုက်တွန်းမှာကြားရင်း ၂၀၁၉ ခုနှစ်၊ တိုင်းဒေသကြီးနှင့်ပြည်နယ် ရေကူးပြိုင်ပွဲကို ဖွင့်လှစ်ပေးခဲ့ပါသည်။

ထို့နောက် အားကစားနှင့်ကာယပညာဦးစီးဌာန ညွှန်ကြားရေးမှူးချုပ် ဦးမျိုးလှိုင်၊ ဒုတိယအမြဲတမ်းအတွင်း၀န်နှင့် တာ၀န်ရှိသူများက ပြိုင်ပွဲ၀င်အသင်းများအား လိုက်လံနှုတ်ဆက်ကြပြီး အမျိုးသား မီတာ(၄၀၀)အလွတ်ကူးပြိုင်ပွဲယှဉ်ပြိုင်နေမှုအား ကြည့်ရှုအားပေးခဲ့ကြောင်း သိရှိရပါသည်။

အဆိုပါ တိုင်းဒေသကြီးနှင့်ပြည်နယ် ရေကူးပြိုင်ပွဲတွင် တိုင်းဒေသကြီးနှင့်ပြည်နယ် အသီးသီးရှိ ပြိုင်ပွဲ၀င် အမျိုးသား(၈၁)ဦး၊ အမျိုးသမီး(၅၈)ဦး၊ အားကစားစုစုပေါင်း(၁၃၉)ဦးတို့သည် ဇွန်လ(၂၀)ရက်နေ့မှ ဇွန်လ(၂၁)ရက်နေ့ထိ ၀ဏ္ဏသိဒ္ဓိရေကူးကန်တွင် နေ့စဉ်နံနက် (၉း၀၀)နာရီ မှစ၍ ကျား/မ မီတာ(၄၀၀) အလွတ်ကူးပြိုင်ပွဲ၊ ကျား/မ မီတာ(၂၀၀) တစ်ဦးချင်း(၄)မျိုးကူးပြိုင်ပွဲ၊ ကျား/မ မီတာ(၁၀၀) ပက်လက်ကူးပြိုင်ပွဲ၊ ကျား/မ မီတာ(၁၀၀) ရင်ဘောင်တန်းကူးပြိုင်ပွဲ၊ ကျား/မ မီတာ(၁၀၀)လိပ်ပြာကူးပြိုင်ပွဲ၊ ကျား/မ မီတာ(၁၀၀)အလွတ်ကူးပြိုင်ပွဲ၊ ကျား/မ (၅၀ x ၄)လွန်းပျံလေးမျိုးကူးပြိုင်ပွဲများ ယှဉ်ပြိုင်ကစားကြ မည်ဖြစ်ပါသဖြင့် ရေကူးအားကစားနည်းကို စိတ်ပါ၀င်စားသော မိဘပြည်သူများအနေဖြင့် မည်သူမဆို အခမဲ့ လာရောက်ကြည့်ရှုနိုင်ပါကြောင်း သိရှိရပါသည်။

72 reads

Share this!