၂ဝ၁၇ ခုနှစ်၊ တိုင်းဒေသကြီးနှင့်ပြည်နယ် အသက်(၂၅)နှစ်အောက် အမျိုးသမီးဘောလုံးပြိုင်ပွဲ ဆက်လက်ကျင်းပ

 

 

မျိုးဆက်သစ်အားကစားသမားများ စဉ်ဆက်မပြတ် ထွက်ပေါ်လာစေရေးအတွက် တိုင်းဒေသကြီးနှင့်ပြည်နယ် အားကစားပြိုင်ပွဲများကို နှစ်စဉ်ကျင်းပပြုလုပ်လျက်ရှိပြီး ၂ဝ၁၇ခုနှစ်၊ တိုင်းဒေသကြီးနှင့်ပြည်နယ် အသက်(၂၅)နှစ်အောက် အမျိုးသမီး ဘောလုံးပြိုင်ပွဲ အုပ်စုပွဲစဉ်များကို ယနေ့နံနက်(၇)နာရီခွဲအချိန်တွင်  ဝဏ္ဏသိဒ္ဓိ လေ့ကျင့်ရေးဘောလုံးကွင်းများ၌ ကျင်းပရာ ကွင်းအမှတ်(၁)၌ ရခိုင်ပြည်နယ်အသင်းနှင့် ကချင်ပြည်နယ်အသင်းတို့ ယှဉ်ပြိုင်ကစားကြရာ ရခိုင် ပြည်နယ် အသင်းမှ(၂)ဂိုး၊(၁)ဂိုးဖြင့်လည်းကောင်း၊ ကွင်းအမှတ်(၃)၌ ဧရာဝတီတိုင်းဒေသကြီး အသင်းနှင့် ကရင်ပြည်နယ်အသင်းတို့ ယှဉ်ပြိုင်ကစားကြရာ တစ်ဖက်(၁) ဂိုးစီ သရေရလဒ်ဖြင့်လည်းကောင်း အသီးသီး အနိုင်ရရှိသွားပါသည်။

 

ဆက်လက်၍ နေ့လည်(၃)နာရီအချိန်တွင် ကွင်းအမှတ်(၁)၌ ပြည်ထောင်စုနယ်မြေနေပြည် တော်အသင်းနှင့် မွန်ပြည်နယ်အသင်းတို့ ယှဉ်ပြိုင်ကစားကြရာ မွန်ပြည်နယ်အသင်းမှ (၂)ဂိုး၊ ဂိုးမရှိဖြင့်လည်းကောင်း၊ ကွင်းအမှတ်(၃)၌ မန္တလေးတို်င်းဒေသကြီးအသင်းနှင့် ပဲခူးတိုင်းဒေသကြီးအသင်းတို့ ယှဉ်ပြိုင်ကစားကြရာ မန္တလေးတိုင်းဒေသကြီးအသင်းမှ(၂)ဂိုး၊ (၁)ဂိုးဖြင့်လည်းကောင်း အသီးသီး အနိုင်ရရှိသွားပါသည်။

 

အဆိုပါ ၂ဝ၁၇ ခုနှစ်၊ တိုင်းဒေသကြီးနှင့်ပြည်နယ် အသက်(၂၅)နှစ်အောက် အမျိုးသမီး ဘောလုံးပြိုင်ပွဲအုပ်စုပွဲစဉ်များကို (၁ဝ.၁၂.၁၇)ရက်နေ့တွင်ရပ်နားမည်ဖြစ်ပြီး (၁၁.၁၂.၂ဝ၁၇) ရက်နေ့ ပွဲစဉ်များအဖြစ် နံနက်(၇)နာရီခွဲနှင့် နေ့လည်(၃)နာရီအချိန်များတွင် ဝဏ္ဏသိဒ္ဓိလေ့ကျင်ရေး ဘောလုံးကွင်းအမှတ်(၁)နှင့်(၃)တို့တွင် တနင်္သာရီတိုင်းဒေသကြီးအသင်းနှင့် မကွေးတိုင်းဒေသကြီး အသင်း၊ ရန်ကုန်တိုင်းဒေသကြီးအသင်းနှင့် ချင်းပြည်နယ်အသင်း၊ စစ်ကိုင်းတိုင်းဒေသကြီးအသင်း နှင့် ပဲခူးတိုင်းဒေသကြီးအသင်း၊ ရှမ်းပြည်နယ်အသင်းနှင့် မန္တလေးတိုင်းဒေသကြီးအသင်းတို့ ယှဉ်ပြိုင် ကစားကြမည်ဖြစ်ပါသဖြင့် ဘောလုံးအားကစားနည်းကို စိတ်ပါဝင်စားသော မိဘပြည်သူများအနေဖြင့် မည်သူမဆိုအခမဲ့ လာရောက်ကြည့်ရှုနိုင်ပါကြောင်း သိရှိရပါသည်။